Իջևան էր ժամանել հայոց բեմի գեղեցկուհին` Սունդուկյանի անվան թատրոնի դերասանուհի Մետաքսյա Սիմոնյանը: Նա ասմունքի ջերմ երեկո նվիրեց իջևանցիներին: Ջերմ ընդունելություն տեղի ունեցավ Հայկոմկուսի Իջևանի շրջկոմում, որի ղեկավարը մեծ արվեստասեր էր, ուստի պատրաստակամություն հայտնեց դերասանուհուն աջակցել շրջանում հետաքրքրող հարցերում: Բոլորի համար անսպասելիորեն դերասանուհին ցանկացավ լինել հոգեբուժարանում.
-Ցանկանում եմ հասկանալ հոգեպես շեղված մարդկանց վարվեցողությունը, նրանց դատողության դրսևորումները:
Շրջկոմի առաջին քարտուղարը հանձնարարեց երրորդ քարտուղարին, որ նույնպես մի սիրունիկ կին էր,հոգեբուժական հիվանդանոց ուղեկցել դերասանուհուն:
Գլխավոր բժիշկն իր անձնակազմով ջերմորեն դիմավորեց պատվավոր հյուրին: Առանձնասենյակ հրավիրվեցին մի քանի հիվանդներ, որոնց հետ զրուցեց Մետաքսյան, ապա ցանկացավ լինել հիվանդասենյակներից մեկում: Երբ մտան տղամարդկանց հիվանդասենյակ, դերասանուհին ջերմ բարևեց դժբախտ մարդկանց և սրտառուչ հարցրեց.
-Ոնց եք, տղաներ:
-Ոնց դենք ըլիլ,աքիր ջան, անկնիկ կտորվմ ենք,- պատասխանեց ատլետիկ կազմվածքով մեկը: — Բա ծեզ հետ ուրուշ կնիկ չեք պիրել, մենք վեց հնգեր ենք:
-Սրանք բոլորովին հիվանդ չեն, ավելին ճաշակով տղերք են,- խնդմնդալով ասաց դերասանուհին, որի այցն Իջևան դրանով էլ ավարտվեց:
